Վերսկսեց Մատաղիսի գործը
Այսօր` մարտի 4-ին, վերաքննիչ դատարանը վերսկսեց 2003թ. Մատաղիսի զորամասում սպանված երկու զինծառայողներից Ռոման Եղիազարյանի հարազատների` Շիրակի մարզի ընդհանուր իրավասության դատարանի կայացրած վճռի վերաբերյալ բողոքարկման քննությունը։
Դատարանում այսօր տուժող կողմ է ներկայացել սպանված զինվոր Հովսեփ Մկրտումյանի հայրը՝ Մովսես Մկրտումյանը։ Դատը վարում է Եվա Դարբինյանը, իսկ 3 արդարացվածների շահերը դատարանում պաշտպանում են փաստաբաններ ՍտեփանՈսկանյան և Հայկ Ալումյանը։
Հիշեցնենք, որ դատարանն այդ վճռով 2012թ. դեկտեմբերի 18-ին գործով մեղադրվող նույն զորամասի զինծառայողներ Արայիկ Զալյանին, Մուսա Սերոբյանին և Ռազմիկ Սարգսյանին ազատ էր արձակել հենց դատարանի դահլիճից:
Ռոման Եղիազարյանի հարազատները համոզմունք էին հայտնել, որ նույն զորամասում սպանված մյուս զինվորի՝ Հովսեփ Մկրտումյանի ծնողները համաձայնության են եկել ամբաստանյալների հետ՝ գումարի դիմաց։
Նրանք լրագրողներին մի տեսագրություն էին ներկայացրել, որտեղ նախկին մեղադրյալ ՌազմիկՍարգսյանը քննիչ Արմեն Հակոբյանին դեպքի վայրում պատմում է սպանության մանրամասները: Ռոման Եղիազարյանի հարազատները պնդում էին, թե ձայնագրությունը ամբողջովին ապացուցում է, որ հենց նրանք են կատարել սպանությունը:
Ինը տարվա վաղեմություն ունեցող Մատաղիսի գործով այն ժամանակ փաստաբան, այժմ ԱԺ «Ժառանգություն» խմբակցության պատգամավոր Զարուհի Փոստանջյանն ավելի վաղ ասել էր, որ Մատաղիսի գործի հիմնական մեղավորը նախկին զինդատախազ, այժմ «Հայ ազգային կոնգրես» խմբակցության պատգամավոր Գագիկ Ջհանգիրյանն է:
