Առողջ ազգաբնակչություն ունենալու համար պետք է շահագրգռված լինեն եւ բժիշկը, եւ պացիենտը
Դարակերտի առողջության առաջնային պահպանման կենտրոնի ղեկավար
Էռնեստ Բալույանցի խոսքը
«Բարեփոխումների աջակցության հանրային նախաձեռնության» կազմակերպած «Առողջապահության ոլորտի արդյունավետ կազմակերպում եւ կառավարում» թեմայով հանդիպում-քննարկման ժամանակ
Ես «Բարեփոխումների աջակցության հանրային նախաձեռնության» կազմակերպած քննարկման միակ մասնակիցն եմ, որ մարզային կլինիկա եմ ներկայացնում: Լսելով կոլեգաներիս խոսքը՝ ինձ մոտ այնպիսի տպավորություն է, որ մարզերում առողջապահության վիճակը ավելի լավ է, քան՝ մայրաքաղաքում: Օրինակ, պատվաստանյութերի հետ կապված կարող եմ ասել, որ մեր մարզում, երբ գրիպի պատվաստանյութ ենք ստանում, բաշխում ենք տարբեր խմբերի: Սկզբում պատվաստվում են երեխաները, այնուհետեւ՝ դիսպանսերում գրանցված հիվանդները, զորակոչիկները: Եթե պատվաստանյութ է ավելանում դրանից օգտվում են նաեւ մյուս բնակիչները: Նույնն էլ, իմ կարծիքով, մայրաքաղաքում պետք է արվի: Պոլիկլինիկաները, երբ ստանում են պատվաստանյութերը իրենք են որոշում՝ ինչպես կիրառել այն, հրամանը բոլորի համար նույնն է:
Առողջապահության ոլորտը զարգացնելու եւ առողջ ազգաբնակչություն ունենալու համար պետք է շահագրգռված լինեն եւ բժիշկը, եւ պացիենտը: Յուրաքանչյուրը պետք է իմանա իր իրավունքներն ու պարտականությունները: Բժիշկը պետք է կարողանա հետեւել աշխարհի փորձին ու լավագույնս կիրառել այն պրակտիկայում: Բայց հիվանդ էլ իր հերթին պետք է ուշադիր լինի իր առողջության հանդեպ: Պրոֆիլակտիկ դիմի բժշկին: Բժիշկը չի կարող համոզել պացիենտին, որ նա պարտավոր է տարին մեկ բուժզննում անցնել:
Բարեփոխումների աջակցության հանրային նախաձեռնություն
«Երեւակ» լրատվական-վերլուծական խումբ
